Mae CEDAR (Canolfan ar gyfer Gwerthuso Gofal Iechyd, Asesu Dyfeisiau ac Ymchwil) yn cynhyrchu tystiolaeth i gefnogi gwneud penderfyniadau mewn gofal iechyd, gan gynhyrchu adroddiadau cynhwysfawr ar agweddau clinigol, cost-effeithiolrwydd, rheoleiddio a diogelwch technolegau iechyd sy’n dod i’r amlwg, ymyriadau gofal iechyd ac ad-drefnu gwasanaethau’r GIG. Mae Cedar yn darparu gwasanaethau i Ganolfan Gwerth Cymru mewn Iechyd (WViHC), y Sefydliad Cenedlaethol dros Ragoriaeth mewn Iechyd a Gofal (NICE), Pwyllgor Gwasanaethau Iechyd Arbenigol Cymru (WHSSC), a Llywodraeth Cymru. Maent yn gweithio’n agos gyda diwydiant, y byd academaidd, a gweithwyr iechyd proffesiynol i gychwyn a chynnal adolygiadau tystiolaeth, astudiaethau ymchwil a gwerthuso.
Mae CEDAR yn ymgymryd ag adolygiadau tystiolaeth ar amrywiaeth o bynciau. Gall y rhain fod yn adolygiadau systematig manwl neu’n brosiectau casglu tystiolaeth cyflym. Mae staff CEDAR wedi’u hyfforddi mewn methodolegau adolygu systematig gan gynnwys chwilio am lenyddiaeth, gwerthuso beirniadol, synthesis tystiolaeth a meta-ddadansoddi. Mae gan CEDAR bartneriaeth sefydledig â’r Uned Arbenigol ar gyfer Tystiolaeth Adolygu (SURE) ym Mhrifysgol Caerdydd. Mae CEDAR wedi’i gontractio gan y Sefydliad Cenedlaethol dros Ragoriaeth mewn Iechyd a Gofal (NICE) i gynnal adolygiadau tystiolaeth ar dechnolegau meddygol a chan Bwyllgor Gwasanaethau Iechyd Arbenigol Cymru (WHSSC) i ddarparu adolygiadau cyflym i gefnogi eu polisïau comisiynu. Maent hefyd yn cynnal adolygiadau tystiolaeth annibynnol ar gyfer amrywiaeth o gwsmeriaid a mathau o brosiectau.
