Technoleg monitro o bell yn mynd yn fyw i wella gofal cleifion yng Nghymru

Mae menter monitro o bell newydd a gynlluniwyd i wella gofal cleifion ledled Cymru bellach wedi mynd yn gwbl fyw. Mae’r prosiect, sy’n cael ei arwain gan Ganolfan Ragoriaeth SBRI mewn partneriaeth ag Ymddiriedolaeth GIG Prifysgol Gwasanaethau Ambiwlans Cymru (WAST) a Llywodraeth Cymru, yn rhan o Raglen Arloesi SBRI a’i nod yw cefnogi cleifion trwy dechnoleg iechyd ddigidol.

Mae’r system monitro o bell, sy’n cael ei phweru gan blatfform digidol Luscii, yn galluogi clinigwyr WAST i olrhain data iechyd cleifion mewn amser real, gan ganiatáu ar gyfer ymyriadau cynharach a defnydd mwy effeithlon o adnoddau’r GIG.

Mae’r platfform bellach yn weithredol ledled Cymru ar gyfer cleifion cymwys. Gall clinigwyr WAST fonitro arwyddion a symptomau hanfodol cleifion o bell, gan sicrhau ymatebion clinigol amserol pan fo angen.

Mae’r dechnoleg hon bellach yn cael ei defnyddio mewn cartrefi gofal o fewn Byrddau Iechyd Prifysgol Betsi Cadwaladr, Hywel Dda a Chwm Taf Morgannwg. Er bod pecynnau penodol wedi’u defnyddio yn yr ardaloedd hyn, gall pob bwrdd iechyd a chartref gofal yng Nghymru gymryd rhan.

Dywedodd Dr Sree Andole, Cyfarwyddwr Meddygol Gweithredol Dros Dro ym Mwrdd Iechyd Prifysgol Betsi Cadwaladr, “Rydym yn falch o groesawu Canolfan Ragoriaeth SBRI ac i fod y Bwrdd Iechyd cyntaf i ymuno â’r treial hwn, gan ddangos ein hymrwymiad i arloesi a sicrhau’r canlyniadau gorau i’n cleifion.”

Mae Ymatebwyr Lles Cymunedol hefyd yn defnyddio’r dechnoleg i gefnogi cleifion yn eu hardaloedd lleol, gan ddarparu haen ychwanegol o ofal y tu allan i leoliadau gofal iechyd traddodiadol.

Mae adborth cychwynnol o’r treial yn awgrymu bod y system yn cael effaith gadarnhaol drwy roi gwybodaeth amser real i glinigwyr am iechyd cleifion. Mae hyn yn eu galluogi i adnabod newidiadau yn gynnar a gwneud penderfyniadau cyflymach a mwy gwybodus am ofal.

Dywedodd aelod o staff o gartref gofal oedd yn cymryd rhan yn y treial ym Mwrdd Iechyd Prifysgol Betsi Cadwaladr: “Fe allwn ni wneud ein rhan ni, fe allan nhw (y clinigwyr) wneud eu rhan, ac mae’n golygu y gallwn ni ddod i benderfyniad gwell gyda’n gilydd.”

Mae monitro o bell hefyd yn dangos addewid mewn lleoliadau ambiwlans, lle gall mynediad at ddata iechyd byw gefnogi gwell gofal yn ystod ymatebion brys. Mae’n helpu gweithwyr gofal iechyd proffesiynol i nodi a yw claf yn gwella neu’n mynd yn sâl, gan arwain at benderfyniadau cyflymach a mwy cywir.

Mae canfyddiadau cynnar yn awgrymu bod y dechnoleg yn ei gwneud yn haws i bobl gael gofal yn eu cymunedau eu hunain. Gall hyn helpu i osgoi ymweliadau ysbyty diangen ac mae’n cefnogi nod ehangach GIG Cymru o ddarparu mwy o ofal yn nes at y cartref.

Mewn cartrefi gofal, mae’r treial wedi helpu i feithrin cysylltiadau cryfach rhwng staff a thimau’r GIG. Mae’n rhoi sicrwydd i breswylwyr a gofalwyr drwy greu cysylltiad uniongyrchol â chymorth clinigol pan fo’i angen fwyaf.

Mae’r treial yn parhau i gasglu data ac adborth i asesu effaith monitro o bell ar ganlyniadau cleifion a gwasanaethau’r GIG. Bydd y mewnwelediadau o’r rhaglen hon yn helpu i lywio mentrau iechyd digidol ledled Cymru yn y dyfodol.